السبت , أكتوبر 21 2017
الرئيسية / أخبار فنية / رسالة عتب من هادي شرارة إلى فيروز: عم أكتبلك من قلب محروق!

رسالة عتب من هادي شرارة إلى فيروز: عم أكتبلك من قلب محروق!

نشر الموزّع الموسيقي هادي شرارة عبر حساباته الخاصة بمواقع التواصل الإجتماعي رسالة عتب إلى السيدة فيروز مستخدماً عناوين أغنيات سفيرتنا إلى النجوم ليُظهر التغيرات الّتي طرأت على حياتنا بين الأمس واليوم.

فكتب هادي شرارة في رسالته التالي:

“عزيزتي السيدة فيروز،

عم إكتبلك من قلب محروق بدون مقدّمات أنا عاتب عليكي… من أنا وزغير وإنت بتخبريني عن عالم حلو وناس طيبين وكل شي منيح… يمكن إنت قرفانة هالإيام من الوضع ومش عم تتابعي الأخبار. خلليني أعطيكي فكرة عن هيدا العالم شو صاير فيه… قبل كل شي، لا تسأليني كيفك إنت؟ لأني مني منيح… وح  قللك ليش”.

وتابع شرارة “البوسطة يللي كانت ناقلتنا من ضيعة حملايا على ضيعة تنورين، مرقت بعين الرمانة وصار يللي صار… ومن وقتها وليالي الشمال حزينة والظاهر ح تبقى حزينة… القهوة يللي عالمفرق بعدها موجودة، بس زبوناتها عم يشربوا معسل، ويشموا حشيش… قلتيلي احكيلي احكيلي عن بلدي؟ شو بدي احكيلك عن بلدك؟ هيدا ما غيرو لبنان الأخضر؟ الله وكيلك الفتوش فرم كل الأخضر يللي فيه، وسمعت إنو عم يحضر قانون يخصص جبل الشيخ… أسامينا؟ والله يا ست كنا ننخطف عالحواجز ونندبح بسبب أسامينا… بتتذكري يا فيروز الصبيان يللي كانوا يلعبوا عالمي طفشوا من ريحة المجارير… أما حنا السكران فبطّل يصور وصار يشوفن وقت بدو… على فكرة بعدو في ناس عالمفرق تنطر ناس… حتى ينتفوا بعض كل ما طلع زعيم وحكي كم كلمة… أما الهولالا يللي عم ينسم علينا صارت ريحتو بشعة لأنها جاية من جبل النفايات”.

وأضاف هادي قائلاً “في أخبار مش حلوة يا فيروز… مختار المخاتير عطاكي عمره من زمان… بس إبنو أخذ المخترة من بعده ومن وقتها بعدو مختار لأنو الظروف الأمنية القاهرة عن تحول دون إجراء إنتخابات… بيك يللي راح مع العسكر خطفه داعش واليوم هو موجود بجرود عرسال… أما عبدو فمسكين رمي حالو عن سطح البلدية لأن وردة الجورية تركتو وهربت مع سعادة النائب بعد ما شكّلها ألماس… بس الخبرية الحلوة إنو شادي ما عاد ضايع… إيه لقيناه… ليكو بمخيم عين الحلوة”.

وختم رسالته “كلمة أخيرة يا ست، الله يرضي عليكي لا بقى تغني ردني إلى بلادي، لأنو بلادك ما عادت بلادك”.

لاولو

حول شجون عربية

تفقد أيضاً

عطلة المسلمين في ألمانيا تثير جدلاً واسعاً

أثار وزير الداخلية الالماني توماس دو ميزيير المقرب من المستشارة انجيلا ميركل جدلا واسعا و …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *